ხვიჩა კვარაცხელიას PSG საფრანგეთის ჩემპიონი გახდა და რეკორდი დაამყარა (ვიდეო)

შაბათს „პარი სენ-ჟერმენმა“ მე-13-ედ მოიპოვა საფრანგეთის ჩემპიონის ტიტული, რითაც რეკორდი დაამყარა. კვარას გუნდმა „ანჟე“ დაამარცხა 1:0 დეზირე დუეს გოლით მეორე ტაიმის დასაწყისში, 55-ე წუთზე და ლიგა 1-ის 2024-2025 წწ. სეზონის დასრულებამდე 6 ტურით ადრე დაეუფლა ჩემპიონის ტიტულს.

აღსანიშნავია, რომ გოლი კვარაცხელიას გადაცემით გავიდა – ხვიჩამ მცველს ბურთი აართვა, საჯარიმოში დეზირე დუეს მისამართით გაგზავნა, რომელმაც თავური დარტყმით „“პსჟ დააწინაურა. ქართველმა ლეგიონერმა კი საგოლე გადაცემა მიითვალა.

ამრიგად, ხვიჩა კვარაცხელია იტალიის ჩემპიონობის შემდეგ საფრანგეთის ჩემპიონის ტიტულს ეუფლება თავის გუნდთან ერთად.

„პსჟ“-ს ამ გამარჯვებამ კიდევ ერთხელ აჩვენა გუნდის დომინანტური როლი ქვეყნის ჩემპიონატში Qatar Sports Investments-ის მიერ მისი შეძენიდან (2011 წ.) 13 წელზე მეტი ხნის განმავლობაში. ამ გამარჯვებით პარიზულმა კლუბმა ქვეყნის ჩემპიონის ტიტული ზედიზედ მეოთხედ მოიპოვა, ხოლო 2011 წლიდან – 11-ჯერ 13 სეზონში.

დაჯილდოების ცერემონია მოგვიანებით გაიმართება, შაბათს კი გუნდის გულშემატკივრებმა მათი ფავორიტის გამარჯვება ხმაურიანად აღნიშნეს.

დღევანდელი მოგება გუნდისთვის განსაკუთრებით მნიშვნელოვანი იყო ჩემპიონთა ლიგის მატჩის წინ – მომავალ ოთხშაბათს, 9 აპრილს „პსჟ“ „ასტონ ვილას“ საკუთარ მოედანზე „პარკ დე პრენსზე“ უმასპინძლებს მეოთხედფინალურ შეხვედრაში (თბილისის დროით 23:00 სთ-ზე დაიწყება), განმეორებითი მატჩი კი 15 აპრილს გაიმართება ინგლისში (თბილისის დროით 23:00 სთ-ზე).

ნუცა ყაველაშვილი