პატრულის მანქანის ე.წ. კაპოტზე სახით დამაწვინეს, პატრულის თანამშრომელმა მარცხენა ჯიბეში მოათავსა ნივთიერება – ახობაძე

თბილისის საქალაქო სასამართლოში მიმდინარე პროცესზე ექიმმა გიორგი ახობაძემ განაცხადა, რომ პატრულის თანამშრომელმა დაკავებისას მას ჯიბეში ნივთიერება ჩაუდო:

„დაკავების შემდეგ, არც ადვოკატთან და არც ახლობლებთან კომუნიკაციის საშუალება არ მქონია, ვერ შევატყობინე, რომ დაკავებული ვიყავი.
პატრულმა რომ გამაჩერა, ძალის გამოყენებით მოხდა პატრულის მანქანის ე.წ. კაპოტზე სახით დაწვენა. პატრულის თანამშრომელმა მარცხენა ჯიბეში მოათავსა ნივთიერება“,- განაცხადა ახობაძემ. [IPN]

შეგახსენებთ, რომ ახობაძე 7 დეკემბერს, თამარ მეფის გამზირზე, მანქანით გადაადგილებისას ძალადობრივად დააკავეს. ის რუსთაველის გამზირზე მიმდინარე აქციიდან ბრუნდებოდა.

მის წინააღმდეგ ოლიგარქიულმა რეჟიმმა საქმე 260- მუხლით აღძრა, რაც ნარკოტიკული საშუალების უკანონო დამზადება, წარმოება, შეძენა, შენახვა, გადაზიდვას ან გადაგზავნას გულისხმობს. ბრალი 8-დან 20 წლამდე, ან უვადო პატიმრობას ითვალისწინებს.

პროკურატურა დღევანდელ პროცესზე მისთვის აღკვეთის ღონისძიების სახით პატიმრობის შეფარდებას მოითხოვს, ხოლო დაცვის მხარე დაკავებულის გირაოს სანაცვლოდ გათავისუფლებას.