სომხეთის პრემიერ-მინისტრი ნიკოლ ფაშინიანი საქართველოს სტუმრობს

სომხეთის პრემიერ-მინისტრი ნიკოლ ფაშინიანი საქართველოში იმყოფება. მთავრობის ადმინისტრაციაში დახვედრის ოფიციალური ცერემონია გაიმართა, სადაც პრემიერ-მინისტრმა ირაკლი კობახიძემ სომეხ კოლეგას უმასპინძლა.

პრემიერ-მინისტრებმა ფაშინიანმა და კობახიძემ პირისპირ და გაფართოებულ ფორმატში შეხვედრები გამართეს, რის შემდეგაც ერთობლივი პრესკონფერენცია გაიმართა.

პრესკონფერენციაზე პრემიერ-მინისტრმა ირაკლი კობახიძემ ხაზი გაუსვა საქართველოსა და სომხეთს შორის არსებულ სტრატეგიულ პარტნიორობას, „რაც, რა თქმა უნდა, კიდევ უფრო მეტად შეუწყობს ხელს ჩვენი ურთიერთობების შემდგომ გაღრმავებას“. ორმა ქვეყანამ სტრატეგიული პარტნიორობის შესახებ დეკლარაციას ხელი 2024 წლის 26 იანვარს მოაწერა.

კობახიძემ განაცხადა, რომ შეხვედრის დროს მან მადლობა გადაუხადა სომხეთის პრემიერ-მინისტრს „ისტორიული გადაწყვეტილებისთვის“, მხარე დაეჭირა გაეროს ივნისის რეზოლუციისთვის, რომელიც ადასტურებს ყველა დევნილისა და ლტოლვილის უფლებას დაბრუნდნენ აფხაზეთსა და ცხინვალის რეგიონში. „რა თქმა უნდა, ეს გადაწყვეტილება კიდევ უფრო მეტად გაამყარებს ურთიერთობებს ჩვენს ორ ქვეყანას შორის“, – განაცხადა პრემიერმა კობახიძემ.

მან ასევე განაცხადა, რომ შეხვედრაზე მან მადლობა გადაუხადა სომხეთის პრემიერ-მინისტრს საქართველოს სუვერენიტეტისა და ტერიტორიული მთლიანობის მხარდაჭერისთვის.

პრემიერ-მინისტრმა კობახიძემ ასევე ხაზგასმით აღნიშნა, რომ საქართველოსა და სომხეთს „ძალიან ხშირი“ ორმხრივი ვიზიტები აქვთ და სრული მზაობა გამოხატა, რომ ვიზიტების ეს დინამიკა მომავალშიც შენარჩუნდეს.

კობახიძის თქმით, მხარეებმა განიხილეს ქვეყნებს შორის არსებული ურთიერთობები ყველა სფეროში, მათ შორის პოლიტიკაში, ეკონომიკაში, კულტურასა და განათლებაში.

„საქართველო მხარს უჭერს სამხრეთ კავკასიაში სტაბილურობას და მშვიდობიან თანაცხოვრებას“, – განაცხადა და დასძინა, რომ საქართველო მიესალმება სომხეთ-აზერბაიჯანის კონფლიქტის მშვიდობიანი მოგვარების პროცესს და „კონკრეტულად, სომხეთის ხელისუფლების ძალისხმევას, რომელიც მიმართულია მეზობელ ქვეყნებთან ურთიერთობების ნორმალიზაციისკენ“. მან დასძინა: „ჩვენ მზად ვართ რეგიონში მშვიდობისა და სტაბილურობის უზრუნველყოფაში ჩვენი როლი შევასრულოთ, ჩვენი შესაძლებლობების ფარგლებში“.

სომხეთის პრემიერ-მინისტრმა ნიკოლ ფაშინიანმა ასევე გაუსვა ხაზი ორ ქვეყანას შორის ურთიერთობების განვითარებას სტრატეგიული პარტნიორობის დონეზე.

მან ხაზი გაუსვა ორივე ქვეყნის მიერ ერთმანეთის ტერიტორიული მთლიანობის აღიარების მნიშვნელობას.

პრემიერ-მინისტრმა ფაშინიანმა განაცხადა, რომ შეხვედრაზე ასევე განიხილეს რეგიონული მშვიდობისა და სტაბილურობის საკითხები. მისი თქმით, მან ქართველ კოლეგას მიაწოდა ინფორმაცია სომხეთ-აზერბაიჯანის კონფლიქტის უახლესი მოვლენების შესახებ.

მისი თქმით, მას მიაჩნია, რომ არსებობს ისტორიული შესაძლებლობა რეგიონში კონფლიქტების დასასრულებლად და მდგრადი მშვიდობის დასამყარებლად. ფაშინიანმა დასძინა, რომ ამით ისარგებლებენ არა მხოლოდ სომხეთი და აზერბაიჯანი, არამედ საქართველო, თურქეთი და ირანიც.

მან ხაზი გაუსვა საქართველოს ხელისუფლების ძალისხმევას, ხელი შეუწყოს რეგიონულ და საერთაშორისო მშვიდობასა და სტაბილურობას.

ასევე წაიკითხეთ:

• 25/03/2024 – პრემიერ-მინისტრი ირაკლი კობახიძე სომხეთს სტუმრობს

This post is also available in: English (ინგლისური)