#OK! 8 ფილმი, რომელიც შემოდგომაზე უნდა ნახოთ

შემოდგომა გრძელი, გრილი საღამოების დროა, რაც ნიშნავს, რომ შეიძლება ჩაი დავაყენოთ, პლედი მოვიხვიოთ და  გულისამაჩუყებლად მგრძნობიარე ფილმებს ვუყუროთ.
სექტემბერი, ოქტომბერი და ნოემბერი — ამ სამ თვეს გამჭოლი ქარებისა და ოქროსფერი ფოთლების გარდა, მსუბუქი სევდასაც ახლავს. ის გვაიძულებს ვიფიქროთ იმაზე, რაც უკვე იყო და ისევ იქნება. გთავაზობთ ფილმების ჩამონათვალს, რომელიც შემოდგომას შეგაყვარებთ.

„ტკბილი ნოემბერი“ (2001)

ის არც ერთ იმ ქალს არ ჰგავს, რომელსაც წარმატებული ბიზნესმენი, სახელად ნელსონი ოდესმე იცნობდა. სარა იმ იშვიათ რომანტიკოსთა რიცხვს მიეკუთვნება, რომელიც ყოველ დილას გამორჩეული სიხარულით ხვდება, თითქოს ის უკანასკნელია. სარას სიყვარულის გამო ბიზნესმენი მზადაა ყველაფერზე უარი თქვას, მაგრამ ბედისწერას ვერავინ შეცვლის — სარას განუკურნებელი დაავადება აქვს და მისთვის შემდეგი დღე შეიძლება მართლა აღარასოდეს გათენდეს. დაავადების უკანასკნელი სტადიის შესახებ ნელსონი მხოლოდ ფილმის ფინალში იგებს, მანამდე კი შეყვარებულებს შემოდგომა აქვთ რომ ერთმანეთი უყვარდეთ.

„როდესაც ჰარი შეხვდა სალის “ (1989)

ეს არის ამბავი შეყვარებულების შესახებ, რომლებიც საკუთარ თავსაც არ უტყდებიან, რომ მათ შორის რაღაც მეგობრობაზე მეტია. ჰარი ქორწინდება, სალის ახალი მეგობარი მამაკაცი ჰყავს, თუმცა არც ერთი ბედნიერი არაა..
სხვა ადამიანთან სიყვარულის პოვნის უსასრულო მცდელობები მუდამ მარცხით და იმედგაცრუებით მთავრდება. ყველაფერს ერთადერთი შეხვედრა შეცვლის, როდესაც სიყვარულის მაძიებლებს ყველაფრის თავიდან დაწყების შანსი მიეცემათ, ოღონდ ამჯერად უკვე არა საუკეთესო მეგობრებად. ისარგებლებენ  თუ არა ისინი ბედის საჩუქრით, ფილმის ნახვის შემდეგ გაიგებთ.

„შემოდგომის ლეგენდები“ (1994)

ფილმის სიუჟეტი ზღაპარს ჰგავს — მამა და მისი სამი ვაჟი მშვიდად და ბედნიერად ცხოვრობდა, სანამ მათ ცხოვრებაში მშვენიერი გოგონა არ გამოჩნდა. სწორედ აქ ზღაპარი მთავრდება და მძიმე რეალობა იწყება. მამაკაცურ სამყაროში ქალის გამოჩენა ოთხივე გმირის ცხოვრებას საბედისწეროდ ცვლის. პერსონაჟების პირადი ტრაგედიები პირველი მსოფლიო ომის ფონზე ვითარდება, საიდანაც დაბრუნება ოჯახის ყველა წევრს არ უწერია. ფილმი შემოდგომის სევდითა და წინაპართა მიწისადმი გამოუთქმელი სიყვარულით სავსეა.

„შემოდგომის მარათონი“ (1979)

ამ ფილმზე უამრავი თაობა გაიზარდა, თუმცა ის აქტუალობას დღემდე არ კარგავს. სიუჟეტი მარტივია — ანდრეი ბუზიკინი ნიჭიერი ლიტერატორი და მთარგმნელი, მაგრამ გაუბედავი ადამიანია, რომელსაც ცოლსა და საყვარლის შორის არჩევანის გაკეთების ეშინია.
იმის გამო, რომ გადაწყვეტილების მიღება თავად არ შეუძლია, ოლეგ ბასილაშვილის გმირი იმედს საბედისწერო შემთხვევაზე ამყარებს, რომელიც პასუხისმგებლობისგან გაათავისუფლებს. თითქოს, ზეცამ მისი ვედრება ისმინა — ცოლი, რომლის როლსაც  ნატალია გუნდარევა ასრულებს, სახლიდან თავად მიდის, თუმცა ისევ ბრუნდება და ყველაფერი თავიდან იწყება… ოლეგ ბასილაშვილის გმირი მხოლოდ ერთხელ არის ბედნიერი – როცა მარტო რჩება, თუმცა მისი თავისუფლება დიდხანს არ გრძელდება.. შესანიშნავი მსახიობები, საოცარი მუსიკა და ნამდვილი მოსკოვური შემოდგომა — შემოდგომის საღამოს უკეთესი რა უნდა ინატროთ?

„ჰანა და მისი დები“ (1986)

როგორც ჩანს, ვუდი ალენი არა მხოლოდ საუკეთესო კინორეჟისორი, არამედ შინაგანად მხატვარიცაა. სხვას ვის შეუძლია ურბანული პეიზაჟების მრავალფეროვნება და სილამაზე ასეთი პოეტური სიზუსტით გადმოსცეს? მადლიერების დღე  ნოემბრის ბოლო ხუთშაბათს, ანუ თითქმის ზამთარში აღინიშნება, მაგრამ ყველაზე უფრო შემოდგომური ამერიკული დღესასწაულია. სწორედ ამ დღესასწაულის გარშემო ვითარდება ფილმის სიუჟეტი. მაყურებელს არც  სიურპრიზები მოაკლდება, რადგან ფილმის მთავარი გმირები საბოლოოდ ადამიანები კი არა .. თბილი სვიტრები და პალტოები აღმოჩნდებიან.

„ერთხელ“ (2015)

ამ ფილმში როლებს მსახიობების ნაცვლად, პროფესიონალი მუსიკოსები ასრულებენ. ხშირად რეჟისორების ასეთი ექსპერიმენტები მარცხით მთავრდება, მაგრამ „ერთხელ“ ბედნიერი გამონაკლისია, რადგან აქ მთავარი როლს თავად მუსიკა ასრულებს. ეს კინოა თუ კონცერტი? თავად გადაწყვიტეთ, მაგრამ რომანტიკული განწყობა და მსუბუქი სევდა მიუწვდმელის გამო გარანტირებულია.

„შემოდგომა ნიუ–იორკში“ (2000)

ფილმი, რომელშიც შეყვარებულების როლებს რიჩარდ გირი და ვაინონა რაიდერი ასრულებენ, კლასიკაა, რომელზეც გავიზარდეთ. შემოდგომის ნიუ-იორკი მაყურებელს თავისი მშვენიერებით ატყვევებს. სწორედ აქ, ცენტრალურ პარკში, ოქროსფერი შემოდგომის გულში, მექალთანე უილ კინი თავის მომავალ სიყვარულს, შარლოტას ხვდება. ამ დღის შემდეგ სამყარო „მანამდე“ და „მას შემდეგ“ პერიოდებად გაიყო, მაგრამ რა საშინელი სიურპრიზი მოუმზადა მთავარ გმირებს ბედმა? ამას ფილმის ნახვის შემდეგ გაიგებთ.

„შემოდგომის სონატა“ (1978)

„შემოდგომის სონატა“ შვედი რეჟისორის, ინგმარ ბერგმანის მხატვრული ფილმია. მისი მთავარი გმირი, შარლოტა, სახელგანთქმული პიანისტია, რომელსაც ყველაფერი აქვს, რომ ბედნიერი იყოს: ნიჭი, სახელი, სილამაზე და ორი შვილი, მაგრამ საკუთარი შვილების სიყვარულის უნარი არ გააჩნია.
ქალმა მთელი ცხოვრება მუსიკას მიუძღვნა და მისი მარტოობა მუსიკამ განაპირობა. მრავალი წლის შემდეგ, როცა მსოფლიოში ცნობილი პიანისტი მიყრუებულ სოფელში ჩადის, რომ უფროსი შვილი მოინახულოს, თავზარდაცემული აღმოაჩენს, რომ მისი უმცროსი, პარალიზებული ქალიშვილი ცოცხალია და დედისგან სითბოს და სიყვარულს ელის. ფილმი შარლოტას გამგზავრებით მთავრდება. თითქოს არსაიდან მოსული ქალი ისევ ქრება, რომ საბოლოოდ მიატოვოს შვილები, რომელთა შეყვარება არ შეუძლია.