#OK! SS International EDU for Georgia – შენი შესაძლებლობები უსაზღვროა – ინტერვიუ სოფიკო ქვარცხავასთან

გლობალური კონკურენციის პირობებში ახალგაზრდებისთვის საერთაშორისო განათლების მიღება და ჩვენი საუკუნის კომპეტენციების გამომუშავება მთავარი ფაქტორია წარმატებისთვის. სწორედ ამ სულისკვეთებით და მრავალწლიანი პროფესიული გამოცდილებით სოფიკო ქვარცხავამ თავდაპირველად საერთაშორისო კომპანია SS international edu დააფუძნა, რომელიც მსოფლიოს სხვადასხვა ქვეყანაში პოზიციონირებს, შემდგომ კი საქართველოში SS for Georgia შექმნა, რათა თავისი სიტყვა თქვას გლობალური განათლების სფეროში. SS for Georgia 10 წელია გლობალურ ბაზარზე პოზიციონირებს და მსოფლიოში ახალგაზრდებს განათლებისა და პრაქტიკული გამოცდილების მიღებაში ეხმარება. უფრო ვრცლად ორგანიზაციისა და საკუთარი წარმატების შესახებ თავად სოფიკო გვესაუბრა.

სოფიკო, თქვენი მაგალითი რომ გაგვიზიაროთ, როგორ აირჩიეთ პროფესია?

მე სოხუმში დავიბადე, პატრიოტული სულისკვეთებით გავიზარდე, ჩემს ოჯახში სულ იყო განცდა, რომ სოხუმში, ჩვენს სახლში აუცილებლად დავბრუნდებოდით. მამას დღემდე აქვს სურვილი, ისევ ჭუბერზე გადამატაროს სოხუმში დასაბრუნებლად და მაჩვენოს, ერთი წლის სოფომ რა გზა გამოიარა. მჯერა, რომ ეს დღეც დადგება და ჩემს სახლში დავბრუნდები…

აქტიური და კომუნიკაბელური ბავშვი ვიყავი, ამიტომაც ჩემ გარშემო ყველა მომავალ ჟურნალისტს ელოდა. თუმცა საბოლოოდ არჩევანი საერთაშორისო ურთიერთობებზე შევაჩერე. სტუდენტობაც აქტიური იყო, თვითმმართველობის პრეზიდენტობა, არაერთი საერთაშორისო და ადგილობრივი გამოცდილება, საზღვარგარეთ სწავლა და პრაქტიკები. არასოდეს დავნებებულვარ, მჯეროდა ჩემი შესაძლებლობების, რამაც ჩემი წარმატება განაპირობა.

წარმოგვიდგინეთ SS International EDU for Georgia, რა იყო მისი შექმნის მიზანი?

განათლების სფეროში ტენდენციები ძალიან სწრაფად იცვლება, ამ ეპოქაში კი სასიცოცხლოდ მნიშვნელოვანია, ფეხი აუწყო ინოვაციებს და მხარი დაუჭირო ახალგაზრდებს, ვიზრუნოთ მათ საერთაშორისო განათლებასა და კომპეტენციების განვითარებაზე.

ათი წლის წინ, როდესაც SS International Education დავაფუძნე, ამ სფეროში სულ სხვა რეალობა გვქონდა. დავიწყეთ ფიქრი მომავალზე, ცვლილებებსა და ინოვაციებზე, რომელიც დღეს ასე ძალიან სჭირდება საგანმანათლებლო სივრცეს.

ჩემი მიზანია, ხელი შევუწყო ახალგაზრდებს არსებული შესაძლებლობების გამოყენებაში, რომ ადვილად ადაპტირდნენ ამ კონკურენტულ გარემოში.

რას სთავაზობს SS International Education საზოგადოებას?

SS International Education მსოფლიოს სხვადასხვა ქვეყანაში ოპერირებს: ევროპაში, ამერიკაში, ბრიტანეთში, კანადაში ინდოეთში ა.შ.

ჩვენ უამრავ ახალგაზრდას დავეხმარეთ საჭირო განათლებისა და გამოცდილების მიღებაში. ვახორციელებთ სხვადასხვა მიმართულების პროგრამებს, ერთი-ერთი პროექტი, Lingo Star-ია, პირველი ონლაინოლიმპიადა საქართველოში, რომლის გამარჯვებულები სრული დაფინანსებით გაემგზავრებიან დიდ ბრიტანეთში სასწავლო ვიზიტით.

რატომ ევროპა?

ევროპა არის თანამედროვე, ხარისხიანი განათლების საუკეთესო შესაძლებლობა ახალგაზრდებისთვის.

ვფიქრობ, ამ პროცესში ყველამ უნდა ავიღოთ ჩვენი წილი პასუხისმგებლობა. განათლება კი ყველაზე მეტად გვაახლოებს ევროპულ ოჯახთან, ჩემი წილი პასუხისმგებლობაც აქ არის.

ჩვენი ქვეყნის მომავალი ევროპაშია!

როგორ შეაფასებდით 2024 წელს?

ვფიქრობ, 2024 იყო ძალიან მნიშვნელოვანი და საინტერესო უამრავი გამოწვევით დატვირთული წელი ჩვენი ორგანიზაციისთვის, ბევრი საერთაშორისო პროგრამითა და პროექტით, რომელსაც მოჰყვა ორგანიზაციული ზრდა, მინდა აღვნიშნო, რომ მნიშვნელოვანია ამ გზაზე გუნდური ღირებულებები და მიზანზე ორიენტირება, რასაც ჩვენი გუნდი აბსოლუტურად პასუხობს.

გასულ წელს დავიწყეთ ოქსფორდის უნივერსიტეტთან თანამშრომლობა, რამაც ბევრ ინოვაციურ იდეას ჩაუყარა საფუძველი. დავაფუძნეთ Oxford Centre for leadership საქართველოში, რომელიც ბევრ ახალგაზრდას მისცემს შესაძლებლობას.

ჩვენი სოციალური პასუხისმგებლობაა, დავეხმაროთ ახალგაზრდებს ღირებულის შექმნაში, რათა მსოფლიოზე პოზიტიური გავლენა მოახდინონ თავიანთი ცოდნით.

რა რჩევას მისცემდით ახალგაზრდებს?

საკუთარი თავის რწმენას და გამბედაობას სასწაულების მოხდენა შეუძლია, გჯეროდეთ, რომ რასაც აკეთებთ, აუცილებლად გამოგივათ. შეუძლებელი არაფერია… და, რა თქმა უნდა, რწმენასთან ერთად საჭიროა დაუღალავი შრომა. არ უნდა შეუშინდე შეცდომებს, უნდა გაბედო, ყოველთვის ჯობს სცადო.

სამომავლო გეგმები

სამომავლოდ SS International Education უფრო აქტიურად იმუშავებს ახალგაზრდების შესაძლებლობების გაძლიერებაზე. ჩემი სურვილია, რაც შეიძლება ბევრმა ახალგაზრდამ ირწმუნოს საკუთარი შესაძლებლობების. გჯეროდეთ საკუთარი თავის და გაბედეთ – შეუძლებელი არაფერია!

ტექსტი: სოფიო მალანია

ფოტო: მაკა მეგრელიძე

ლოკაცია: ვერა ჰილსი