1 month ago
25
ბევრისათვის ჯერ კიდევ დაუჯერებლად ჟღერს, რომ 25 წლის მაიკი მედისონმა, რომელიც 62 წლის დემი მურთან ერთად იყო წარდგენილი საუკეთესო მსახიობი ქალის ნომინაციაში, შეძლო და პირველი ოსკარი დაიმსახურა.
მსახიობმა 2024 წლის საუკეთესო ფილმად დასახელებულ „Anora“-ში Ani-ის, ბრაიტონ ბიჩის მოცეკვავისა და სექს მუშაკის, როლი მოირგო, რომელსაც რუსი ოლიგარქის შვილთან აქვს სასიყვარულო კავშირი.
მაიკი მედისონის გამარჯვებამ აზრთა სხვადასხვაობა გამოიწვია კინომოყვარულებში. განსაკუთრებული დაკვირვების საგანი გახდა დემი მურის რეაქცია მაშინ, როდესაც ოსკარის მფლობელი მსახიობი სიტყვით გამოდიოდა აუდიტორიის წინაშე. როგორც აღნიშნავენ, ამ დროს დემი მურმა წარმოთქვა სიტყვა „nice”.
მნიშვნელოვანია, რომ მაიკი მედისონი ოსკარების ისტორიაში მეცხრე ყველაზე ახალგაზრდა მსახიობი გახდა, რომელმაც კინოაკადემიის უმაღლესი ჯილდო მოიპოვა.
იმის გათვალისწინებით, რომ ახალგაზრდა მსახიობს ჯერ კიდევ კარგად არ იცნობს ფართო საზოგადოება, გაგიზიარებთ რამდენიმე ფაქტს კინოს ახალი ვარსკვლავის შესახებ.
მაიკი მედისონი დაიბადა ლოს ანჯელესში და აღიზარდა სან ფერნანდოს ვილაში. მისი მშობლები ფსიქოლოგები იყვნენ და სამსახიობო სფეროსთან მას ბავშვობაში არანაირი შეხება არ ჰქონია. როგორც მსახიობი სხვადასხვა ინტერვიუში აღნიშნავს, მეშვიდე კლასიდან გადაწყვიტა სახლში მიეღო განათლება. ამ პერიოდში, ასევე, გატაცებული იყო ცხენოსნობით და აქტიურად ვარჯიშობდა.
25 წლის ახალგაზრდა მსახიობმა თავისი კარიერა 2013 წელს დაიწყო, როდესაც გამოჩნდა მოკლემეტრაჟიან ფილმებში „Retirement და Pani’s Box“. თინეიჯერობისას ითამაშა სერიალში “Better Things”, რომელსაც მის კარიერაში შეიძლება ითქვას, რომ გარდამტეხი მნიშვნელობა ჰქონდა.
„მე ძალიან ბევრს ვფიქრობ მომავალზე, ასევე, ბევრს ვფიქრობ წარსულზეც. ნამდვილად არ ვიცი რა მოხდება მომავალში. მინდა, რომ გავაგრძელო ფილმების კეთება და იმ ადამიანებთან მუშაობა, რომლებიც ინსპირაციას მაძლევენ იმისათვის, რომ შევქმნა საინტერესო პერსონაჟები და გადმოვცე ამბები, რომლებიც იქნება დამაჯერებელი “-აღნიშნა მსახიობმა, როდესაც მას ჰკითხეს, თუ რა გავლენას იქონიებდა მის კარიერაზე ოსკარი- „ერთადერთი, რაც ახლა ზუსტად ვიცი არის ის, რომ სახლში წავალ, ჩემს ლეკვებთან და მათ არეულ სახლს დავალაგებ, რაც კვლავ დედამიწაზე დამაბრუნებს“.
წითელ ხალიჩაზე “Anora”-ის ვარსკვლავი დიორის კაბით გამოჩნდა, რომელმაც თავისი კლასიკური და ელეგანტური სილუეტით ცერემონიას Breakfast at Tiffany’s-ის ენერგია შემატა. ეს არის კაბა, რომელიც თავად Christian Dior-მა შექმნა 1956 წლის გაზაფხული-ზაფხულის კოლექციისთვის და მასზე მუშაიბისას 400-ზე მეტი საათი დაიხარჯა. რაც შეეხება სამკაულს, მსახიობს ეკეთა ვინტაჟური Tiffany & Co-ის პლატინისა და ბრილიანტის ყელსაბამი რომელიც მის ლუქს მეტ სრულყოფილებას და გრაციოზულობას სძენდა.
English (US) · 
Georgian (GE) ·