'ამ ბიჭს როგორ აკრიტიკებდნენ?!' - მედიის გამოხმაურება კვარას თამაშზე

• ხვიჩა კვარაცხელიას და ნაპოლის სეზონში საუკეთესო თამაში ჰქონდათ
• ქართველი ფეხბურთელის თამაშს იტალიური მედია გამოეხმაურა
• კვარაცხელიას დუბლი და ასისტი, ოსიმენის ჰეთ ტრიკი - ნაპოლიმ სასუოლო გაანადგურა 

იტალიის სერია A-ს 21-ე ტურის გამოტოვებულ შეხვედრაში ნაპოლიმ რეჯო ემილიაში სასუოლო ანგარიშით 6:1 გაანადგურა.

რასაკვირველია, ეს იტალიის მოქმედი ჩემპიონის საუკეთესო თამაში იყო მიმდინარე სეზონში, ასევე, ხვიჩა კვარაცხელიასთვისაც, რომელმაც დუბლი და საგოლე პასი მიითვალა. კვარასთან ერთად გამორჩეული იყო ვიქტორ ოსიმენიც, რომლის ანგარიშზე 3 გოლი და ასისტია.

იტალიურმა მედიამ ქართველი ვარსკვლავის თამაში მაღალი ქულებით შეაფასა:

Tuttonapoli – 8 ქულა: "სასუოლომ მას მისცა სივრცეები, რაც კვარამ საუკეთესოდ გამოიყენა. საგოლე პასი და ორი დიდებული გოლი, პირველი მარჯვენა ფეხით, მეორე ცაციათი ხარიხის ქვეშ".

Calcionapoli1926 – 9 ქულა: "ყველაფერი გააკეთა: გოლები, საგოლე პასი, ბურთის მოპოვება და ფლანგზე სპრინტები. როდესაც ის ბურთს ეხება, უწყვეტ მაგიასთან გვაქვს საქმე. დღეს საღამოს მისი შეჩერება შეუძლებელი იყო. და წარმოიდგინეთ, რომ ვიღაცებს ჰქონდათ გამბედაობა, ის გაეკრიტიკებინათ: ეს სუფთა კლასია".

Tuttomercatoweb – 10 ქულა: "პირველ ტაიმში ცდილობდა გოლის გატანას, მეორე ნახევარი კი ოსიმენზე საგოლე პასით დაიწყო. შემდეგ თვითონაც გაიტანა ლამაზი გოლი და ბოლოს საბოლოო ანგარიში დააფიქსირა".

კვარა-ოსის დუეტი შეუჩერებელი იყო

Calciomercato – 8 ქულა: "მას ჰქონდა დაბრუნების სურვილი, ყოველთვის ითხოვდა ბურთს და უმიზნებდა მეტოქეებს. მოედნის ცენტრიდან სცადა გოლის გატანა, რამაც კონსილი დააფრთხო. შემდეგ ყოველ ჯერზე ანათებდა: ტრესოლდის საჩუქარი შეირგო და ოსიმენს საგოლე პასი გაუკეთა. გოლების დროც მოვიდა - ოსტატობა სრულად გამოავლინა პირველი გოლის ეპიზოდში. კლასი წარმოაჩინა მეორე გოლის დროსაც, როცა მარცხენა ფეხით დუბლი შეასრულა".

Sportvirgilio – 8 ქულა: "მოედნის ცენტრიდან გოლის გატანა სცადა და შედევრამდე ცოტა დააკლდა. ეს ბურთი რომ გასულიყო, ალბათ, სეზონის საუკეთესო გოლი იქნებოდა. მეორე ტაიმის სტარტზე ოსიმენს ისეთი პასი გაუკეთა, ნიგერიელს მხოლოდ გატანა რომ მართებდა. მერე კვარას სტილში გაიტანა გოლი და ბოლოს დუბლიც შეასრულა. "მაპეი სთედიუმი" მისთვის ნამდვილად კარგის მომტანია".

Oasport – 7.5 ქულა: "როგორ აკლდა ქართველს გოლი?! დღეს შთაგონებული იყო სივრცეებით, რომელიც შავ-მწვანეებმა დაუტოვეს. მოედნის ცენტრიდანაც კი სცადა გატანა".

შეგახსენებთ, რომ ხვიჩა კვარაცხელიას მიმდინარე სეზონში ყველა ტურნირზე 34 შეხვედრაში 8 გოლი აქვს გატანილი, გარდა ამისა 5 საგოლე პასი გააკეთა, ხოლო 2-ჯერ პენალტიც მოიპოვა.

ნაპოლი 26 ტურის შემდეგ 40 ქულით მერვე-მეცხრე ადგილებს ლაციოსთან ერთად იყოფს, მომდევნო ტურში კი, 3 მარტს, იუვენტუსს უმასპინძლებს.