radiotavisupleba ახალი ამბები 
გერმანიის ორ ფედერალურ მხარეში რეგიონულ საკანონმდებლო ორგანოებს - მეკლენბურგ-წინა პომერანიაში - ახალ ლანდტაგს (სამხარეო პარლამენტს), ხოლო ბერლინში - ახალ დეპუტატთა პალატას ირჩევენ. ორსავე რეგიონში დაძაბულ ბრძოლას ელოდებიან.
ბერლინში, გამოკითხვებით, „მემარცხენეები“ (Die Linke) და „ქრისტიან-დემოკრატიული კავშირი“ (CDU) ლიდერობენ, ხოლო მეკლენბურგ-წინა პომერანიაში — „სოციალ-დემოკრატები“ (SPD) და „ალტერნატივა გერმანიისთვის“ (AfD).
მეკლენბურგ-წინა პომერანიაში არჩევნებში მონაწილეობის უფლება დაახლოებით 1,3 მილიონ ადამიანს აქვს. პირველად ეძლევათ ხმის მიცემის უფლება 16 და 17 წლის ახალგაზრდებსაც.
კენჭისყრას უცხოეთშიც დიდი ყურადღებით ადევნებენ თვალს, სადაც ყურადღების ცენტრში განსაკუთრებით AfD-ის მიერ მიღწეული შედეგია. ამ პარტიამ მეტოქეები, მათ შორის, ქვეყნის მმართველი ქრისტიან-დემოკრატები, მნიშვნელოვანი უპირატესობით დაამარცხა ახლახან საქსონია-ანჰალტში.
გამოკითხვებით, თანაბარ ბრძოლაა მოსალოდნელი პრემიერმინისტრ მანუელა შვეზიგის „სოციალ-დემოკრატიულ პარტიასა“ (SPD) და AfD-ის შორის. მეკლენბურგ-წინა პომერანიას ამჟამად მართავს კოალიცია, რომელიც შედგება SPD-ისა და „მემარცხენეებისგან“.
ბერლინში, რომელსაც დედაქალაქის გარდა გერმანიის ცალკე მხარის სტატუსიც აქვს, ხმის უფლების მქონეთა რიცხვი 2,5 მილიონს აღწევს. მოსალოდნელია დაძაბული ბრძოლა „ქრისტიან-დემოკრატიულ კავშირს“ (CDU), რომელიც აქამდე SPD-სთან ერთად მართავდა ქალაქს და „მემარცხენეებს“ შორის.
გარდა ამისა, გერმანიის დედაქალაქში ირჩევენ თორმეტ რაიონულ საკრებულოს (Bezirksverordnetenversammlung). აქ ხმის მიცემის უფლება 2,75 მილიონ ადამიანს აქვს, რადგან კენჭისყრაში მონაწილეობა ბერლინში მცხოვრებ ევროკავშირის უცხოელ მოქალაქეებსაც შეუძლიათ.
ორსავე ფედერალურ მიწაზე საარჩევნო უბნები ადგილობრივი დროით 18:00 საათზე დაიხურება.
