- საქართველო 2:0 ლუქსემბურგი
- პირველ ტაიმში ანგარიში ბუდუ ზივზივაძემ გახსნა, 64-ეზე დუბლიც შეასრულა...
- 58-ე წუთზე ლუქსემბურგი ათი კაცით დარჩა
- ბუდუ ზივზივაძემ დუბლი 64-ე წუთზე შეასრულა
საქართელო ევრო 2024-ის პლეი ოფის ფინალშია! ქართული ფეხბურთის მრავალი თაობის გულშემატკივართა ოცნებამდე ერთი გამარჯვებაღა გვაშორებს! მატჩის გმირი ბუდუ ზივზივაძე იყო - მან ლუქსემბურგს ორი გოლი გაუტანა!
ვილი სანიოლმა დისკვალიფიცირებული ხვიჩა კვარაცხელიას არყოფნაში ორი ფორვარდით თამაში გადაწყვიტა - ცენტრფორვარდ ბუდუ ზივზივაძეს გიორგი მიქაუტაძე შეუწყვილა, მათ უკნიდან გიორგი ჩაკვეტაძე ეხმარებოდა. ეროვნულ გუნდში დაბრუნებული ჯაბა კანკავა სასტარტო 11-ეულში ვერ მოხვდა - ნახევარდაცვის შუაში კი ფრანგმა თავკაცმა გიორგი ქოჩორაშვილი და ოთარ კიტეიშვილი გაამწესა. ცენტრალურ მცველთა სამეულის გამოცნობა იოლი იყო, მით უფრო მას მერე, რაც საბა საზონოვი სამატჩო განაცხადში ვერ მოხვდა - საბა კვერკველია, კაპიტანი გურამ კაშია და ლაშა დვალი. ფლანგებზე ოთარ კაკაბაძე და ლევან შენგელია დადგნენ.
პირველი საგოლე მომენტი მე-13 წუთზე შეიქმნა, ქოჩორაშვილმა მეტოქეს ბურთი აართვა, შეტევა ჩაკვეტაძემ გააგრძელა, ბურთი ზივზივაძესთან გაითამაშა, ხოლო ბუდუს დარტყმული ძელს მოხვდა.
21-ე წუთზე ბუდუ ზივზივაძემ გაიტანა, მაგრამ მსაჯმა მეკარეზე თავდასხმა დააფიქსირა და გოლი გააუქმა. მე-40 წუთზე მეკარემ კაკაბაძეს ახლო მანძილიდან აუღო.
ანგარიში 41-ე წუთზე გავიდა - კუთხურმა ლუქსემბურგელი მცველები დააბნია და ბუდუ ზივზივაძემ ახლო კუთხეში გაიტანა - 1:0. ტაიმი, რომელიც საქართველოს სრული უპირატესობით წარიმართა ასევე დასრულდა.
52-ე წუთზე მიქაუტაძეზე შანომ იუხეშა, მაგრამ მსაჯმა თამაში გააგრძელა, მეტიც, ლუქსემბურგმა გოლიც გაიტანა (ჟერსონ როდრიგეში), თუმცა VAR-ზე მომენტი გადამოწმდა, მართალია, ლუქსემბურგის კარში ჯარიმა დაინიშნა და არა პენალტი, მაგრამ შანო მსაჯმა გააძევა. ლევან შენგელიამ 58-ე წუთზე ჯარიმა ხარიხას გაარტყა.
ევრო 2024-ის პლეი ოფის ფინალი 26 მარტს გაიმართება - საქართველოს ნაკრები თბილისში საბერძნეთისა და ყაზახეთის დუელის გამარჯვებული იქნება. ეს მატჩი უახლოეს წუთებში დაიწყება.
საქართველო 2:0 ლუქსემბურგი
გოლები: 1:0 ზივზივაძე (41), 2:0 ზივზივაძე (64. შენგელიას პასით)
საქართველო (3-4-1-2): მამარდაშვილი - კვერკველია, კაშია (კაპ), დვალი - კაკაბაძე, კიტეიშვილი, ქოჩორაშვილი (87. კანკავა), შენგელია (72. წიტაიშვილი) - ჩაკვეტაძე (77. კვეკვესკირი) - მიქაუტაძე (77. დავითაშვილი), ზივზივაძე (86. ქვილითაია)
ლუქსემბურგი (5-3-2): მორისი - იანსი (კაპ), ბონერტი, მაჰმუტოვიჩი (91. მურატოვიჩი), შანო, პინტუ (42, მ, მარტინსი) - კ. მარტინსი, ოლესენი (77. ო. ტილი), ბარეირო - ბორჟეს სანშეში (77. კურჩი), როდრიგეში (91. კორაჩი).