დემონსტრანტების თქმით, თსუ-ის მიმდებარედ ღამისთევას გეგმავენ

საპროტესტო აქციის მონაწილეები ხმის გამაძლიერებლით აცხადებენ, რომ დღეს ამ ადგილას ღამისთევას გეგმავენ.

„სადაც დაიწყო მოპარული არჩევნების შემდეგ პროტესტი, იქ ვათენებთ ღამეს სინდისის პატიმრებისთვის“, - განაცხადა სიტყვით გამოსვლელმა ერთ-ერთმა დემონსტრატმა.

ამასთან, როგორც წინა 196 დღის განმავლობაში, დღეს საღამოს კვლავ გადაიკეტა რუსთაველის გამზირი.

როგორც აქციაზე განაცხადეს, იქ მყოფი დემონსტრანტები თსუ-სთან მისვლას გეგმავენ.

მცირე ხნით ადრე ამ ადგილას დემონსტრანტებმა კარვები გაშალეს.

პოლიციელებმა მათთვის ხელშეშლა სცადეს, თუმცა უშედეგოდ - აქციის მონაწილეებმა მოახერხეს ორი ღია კარვის გაშლა.

დღეს საღამოს აქცია დაიწყო მას შემდეგ, რაც „ქართული ოცნების“ მმართველობის წინააღმდეგ აქციაზე დაკავებულ 21 წლის მათე დევიძეს ოთხ-ნახევარი წლით პატიმრობა მიუსაჯეს.

„მაშინ, როცა ამდენი ჟურნალისტის და აქციის მონაწილის ცემაში პასუხისმგებელი არ არის მიცემული პასუხისგებაში, ჩვენ გვწირავთ იმიტომ, რომ [...]. ისინი არიან სისხლიან ძალაუფლებას და ფულს ამოფარებულები, ჩვენ უსამართლობას დავუდექით პირისპირ. მაპატიეთ, მეგობრებო, უნდა დავტოვო დარბაზი, რადგან არ შემიძლია ამ გადაწყვეტილების მოსმენა“, - თქვა მათე დევიძემ სასამართლო სხდომაზე, რომელიც დატოვა მანამ, სანამ მოსამართლე სათათბიროდ გავიდოდა განაჩენის გამოცხადებამდე.

„სინათლის საძიებლად უსასრულო წყვდიადში“, - ეს იყო ბოლო ფრაზა, რომელიც მან დარბაზის დატოვებამდე თქვა.