მამარდაშვილის მთავარი გამოწვევა ევრო 2024-მდე - გიორგის წინ 9 მატჩი აქვს

• ვალენსიას 23 წლის ქართველი მეკარის შთამბეჭდავი ციფრები და რეკორდის შანსი
• მამარდაშვილს ერთი მშრალი მატჩი სჭირდება, რათა ნეტოს მიღწევა გააუმჯობესოს 
• მამარდაშვილის მე-10 მშრალი მატჩი - ვალენსია მალიორკას დაუზავდა

გიორგი მამარდაშვილმა, მას შემდეგ, რაც საქართველოს ეროვნულ ნაკრებთან ერთად ევრო 2024-ის საგზური მოიპოვა. ვალენსიას დაუბრუნდა და ლა ლიგაში მორიგი მშრალი მატჩი მიითვალა. 23 წლის ქართველმა მეკარემ "მესტალიაზე" მალიორკასთან შეხვედრაში (0:0) კარი სამჯერ გადაარჩინა და სეზონის პირადი რეკორდი დაამყარა. მიმდინარე ლა ლიგაში გიორგის ანგარიშზე უკვე 10 უგოლო თამაშია, წინ კი 9 ტურია დარჩენილი და "ღამურების" გოლკიპერს აქვს საშუალება, თავისი მიღწევა კიდევ უფრო შთამბეჭდავი გახადოს.

გიორგიმ მალიორკასთან პირადი რეკორდი გააუმჯობესა

ამასთან დაკავშირებით ესპანური Superdeporte სტატიას აქვეყნებს, რომელიც გიორგი მამარდაშვილისა და ვალენსიის გულშემატკივრებს ნამდვილად დაინტერესებს:

გიორგი, რომელიც 21-ე საუკუნეში საუკეთესოობისკენ ისწრაფვის

ვალენსიას ცხრა თამაში დარჩა იმისთვის, რომ ამ სეზონს წერტილი დაუსვას, ქართველ მეკარეს კი უკვე აქვს "სუფთა მატჩების" ორნიშნა რიცხვი და ზღვარზეა იმასთან, რომ საუკეთესო შედეგი აჩვენოს "მერიტონის ერაში" და კიდევ უფრო მაღალი მიღწევითაც გამოირჩეს.

გიორგი მამარდაშვილი ესპანეთში პოპულარული მეკარეა და სახელს უკვე კონტინენტის მასშტაბითაც იხვეჭს, რაც შემთხვევითი არაა. ის თამაშით ამტკიცებს, რომ დღეს მსოფლიოში ერთ-ერთი საუკეთესო მეკარეა. ახალგაზრდული ასაკისა და პოტენციალის გათვალისწინებით კი, მისგან უახლოეს წლებში ევროპულ ფეხბურთის მწვერვალების დაპყრობას ელოდებიან. მის გამოსვლას შედეგი უკვე მოყვება: ახლახან ის ლა ლიგის უძვირფასეს, ხოლო მსოფლიოში მეშვიდე ყველაზე ძვირად ღირებულ მეკარედ დასახელდა (Transfermarkt-ის თანახმად), მარტში კი პორტალმა Whoscored-მა ის ლა ლიგის თვის სიმბოლურ გუნდში შეიყვანა.

მართალია, ის თვე ვალენსიასთვის შედეგების თვალსაზრისით არცთუ მთლად პოზიტიური გამოვიდა (წაგება "ლა კერამიკაზე", საშინაო ფრე მალიორკასთან), გიორგის თამაშის დონე ოდნავადაც არ დაუდაბლებია. მან კარი 0-ზე ოთხიდან ორ შეხვედრაში შეინახა და ახლა მის ანგარიშზე სეზონის დასაწყისიდან მოყოლებული, 10 მშრალი მატჩია. 

ეს რიცხვი მას ადგილს უჩენს ვალენსიას მეკარეების იმ რეიტინგში, რომელიც ლა ლიგის სეზონში უგოლო მატჩების რაოდენობას ითვლის. სიაში უპირობო ლიდერი კლუბის ისტორიაში საუკეთესო მეკარე სანტიაგო კანისარესია, რომელსაც 1998-2008 წლების პერიოდში, ოთხ სეზონში ჰქონდა 14, თითოჯერ კი სეზონში 16 და 20 მშრალი მატჩი. ეს უკანასკნელი მიღწევა 2003/04 წლებში დაფიქსირდა - ვალენსიას ისტორიული დუბლის დროს (კლუბმა ლა ლიგა და უეფას თასი მოიგო). 

ზაფხულში გიორგი საქართველოს ნაკრებთან ერთად ევროპის ჩემპიონატზე ითამაშებს

ვალენსიამ ლა ლიგაში ჩატარებულ 29 შეხვედრაში 41 ქულა მოიპოვა და სატურნირო ცხრილში მე-8 პოზიციაზეა. მომდევნო შეხვედრას მამარდაშვილის გუნდი 4 აპრილს, სტუმრად გრანადასთან ჩაატარებს.