პაპუაშვილი: ქცევის კოდექსზე ხელის არმოწერით ოპოზიცია არჩევნების არაღიარებისთვის ემზადება

თბილისი, 16 სექტემბერი - Sputnik. პოლიტიკური პარტიების ქცევის კოდექსზე ხელის არმოწერა არის აღიარება, რომ ოპოზიცია რადიკალური წინასაარჩევნო კამპანიისთვის და არჩევნების შემდეგ რადიკალური დღის წესრიგისთვის ემზადება, განაცხადა საქართველოს პარლამენტის თავმჯდომარემ შალვა პაპუაშვილმა.

პოლიტიკური პარტიების ქცევის (ეთიკის) კოდექსი, რომელიც ცენტრალურმა საარჩევნო კომისიამ (ცესკო) პოლიტიკური პარტიებისთვის შეიმუშავა, 2024 წელს ევროპის პარლამენტის არჩევნებზე გამოყენებული დოკუმენტის ძირითად პრინციპებს ეფუძნება. გუშინ ცნობილი გახდა, რომ 26 ოქტომბრის საპარლამენტო არჩევნებისთვის რეგისტრირებული 27 პარტიიდან ქცევის კოდექსს ხელი ექვსმა მოაწერა.

როგორც პაპუაშვილმა აღნიშნა, რადიკალური ოპოზიცია სინამდვილეში ემზადება არჩევნების მეორე დღისთვის, კენჭისყრის შედეგების არაღიარებისა და ქვეყანაში არეულობის დაწყებისთვის. არ უნდა, ელემენტარულ სტანდარტზე აიღოს პასუხისმგებლობა. „მათ არ უნდათ ელემენტარულ სტანდარტზე აიღონ პასუხისმგებლობა", - დასძინა სპიკერმა.

მმართველ პარტიაში „რადიკალურ ოპოზიციად" და „კოლექტიურ ნაცმოძრაობად" მოიხსენიებენ „ერთიან ნაციონალურ მოძრაობას“, „სტრატეგია აღმაშენებელს“, „ლელოს საქართველოსთვის“, „გირჩი - მეტი თავისუფლებას“, „ახალს“, „დროას“. ხელისუფლების თქმით, ისინი ცდილობენ არიონ ვითარება საქართველოში, მოაწყონ რევოლუცია და, ძალაუფლების შეცვლის შემთხვევაში, ქვეყანა ომში ჩაითრიონ.

ქცევის კოდექსზე ხელმოწერა პოლიტიკური პარტიების წარმომადგენლებს 9 სექტემბრიდან შეეძლოთ.

საქართველოში საპარლამენტო არჩევნები 2024 წლის 26 ოქტომბერს გაიმართება. ოფიციალური წინასაარჩევნო კამპანია 27 აგვისტოს დაიწყო. 26 ოქტომბრის არჩევნები იქნება პირველი არჩევნები, რომელიც ჩატარდება მხოლოდ პარტიული სიებით და ხმის მიცემის ელექტრონული სისტემით - გამოყენებული იქნება ახალი ბიულეტენები და სპეციალური დამთვლელი მანქანა. ახალი ტექნოლოგიები საარჩევნო უბნების 90%-ზე იქნება დანერგილი.

საქართველოს პარლამენტი შედგება 150 დეპუტატისაგან და ირჩევა ოთხი წლის ვადით. საკანონმდებლო ორგანოს წევრი შეიძლება გახდეს 25 წელს ზემოთ საქართველოს მოქალაქე, რომელიც ქვეყანაში მინიმუმ 10 წელი ცხოვრობდა.

სულ გაიხსნება 3.030 საარჩევნო უბანი, საიდანაც 2.262 საარჩევნო უბანზე კენჭისყრა ელექტრონული ტექნოლოგიების გამოყენებით, დანარჩენში კი ტრადიციული მეთოდით გაიმართება.

საქართველოს ცენტრალურმა საარჩევნო კომისიამ 26 ოქტომბრის საპარლამენტო არჩევნებში მონაწილეობის მისაღებად 27 პარტია დაარეგისტრირა და ბიულეტენში პარტიების რიგითობის ნომრები განსაზღვრა. პარტიების რეგისტრაციის შემდეგი ეტაპი პარტიული სიების წარდგენაა, რისთვისაც მათ ვადა 26 სექტემბრამდე აქვთ.

საქართველოში არჩევნებში მონაწილეობა მხოლოდ პარტიებს შეუძლიათ, ბლოკებისა და კოალიციების რეგისტრაცია აკრძალულია.