პატიმრობაში მყოფი გვარამია მეორედ დაიბარეს „ოცნების“ შექმნილ კომისიაზე - ის არც ამჯერად მიდის

„ივანიშვილის რეჟიმის ე.წ. პარლამენტმა დღეს რუსთავის მე-12 სასჯელაღსრულების დაწესებულებაში ე.წ. საგამოძიებო კომისიაზე გამოცხადების მოთხოვნით მეორედ მიმართა პოლიტპატიმარ ნიკა გვარამიას“, - წერს პარტია „ახალი“ და კომისიიდან მიღებულ წერილს ასაჯაროვებს.

წერილში კომისიის თავმჯდომარე თეა წულუკიანი ნიკა გვარამის სწერს, რომ კომისია ითხოვს მისგან „ახსნა-განმარტების მიცემას 2012-2025 წლებში საქართველოს საგარეო პოლიტიკური მიზნების საზიანოდ განხორციელებული ქმედებების შესახებ“ და 30 ივნისს, დილის ცხრა საათზე იწვევს კომისიის სხდომაზე „ჩართვის მეშვეობით“.

„ჩვენი პოზიცია უცვლელია - არც ერთ ეტაპზე არ ვაპირებთ მივიღოთ რეჟიმის თამაშის წესები, მივანიჭოთ მცირედი ლეგიტიმაცია მაინც და ვითანამშრომლოთ ე.წ. კომისიასთან, რომელიც რეალურად ემსახურება ეროვნული ინტერესების ღალატსა და ისტორიის გადაწერას“, - წერს პარტია „ახალი“ ფეისბუკზე.

გვარამის მსგავსად, ამავე საქმეზე - კომისიაში გამოუცხადებლობის და შემდეგ გირაოს გადაუხდელობის ბრალდებით - დაკავებულია მისი კოლეგა, „ახალის“ თანადამფუძნებელი ნიკა მელიაც.

პატიმრობაშია ასევე ყოფილი თავდაცვის მინისტრი ირაკლი ოქრუაშვილი.

„თანმიმდევრულობა, პრინციპულობა, შეურიგებლობა და ართანამშრომლობა, მათ შორის, არმონაწოლეობა არჩევნებად წოდებულ ფარსში, არის გზა გამარჯვებისკენ“, - წერს პარტია.

„ქართული ოცნების“ მიერ სადავო პარლამენტში შექმნილ დროებით საგამოძიებო კომისიაზე, გვარამიას გარდა, კიდევ ერთხელ დაიბარეს ოპოზიციონერი პოლიტიკოსები:

• „ლელო“/„ძლიერი საქართველოს“ ლიდერი მამუკა ხაზარაძე (ხაზარაძე აქამდეც იყო დაბარებული, თუმცა არ მივიდა და გირაო გადაიხადა);
• პარტიის, „გახარია საქართველოსთვის“, ლიდერი, ექსპრემიერი გიორგი გახარია. გახარია კომისიაზე 14 აპრილს გამოცხადდა, რის გამოც ოპოზიციური პარტიების კრიტიკა დაიმსახურა. ამასთან, გახარია პროკურატურაშიც არის დაბარებული