რუსეთი საქართველოში „რუსული ენის პოპულარიზაციისთვის“ იმუშავებს - დიპლომატი

საქართველოში შვეიცარიის საელჩოში რუსეთის ინტერესების სექციას ახალი ხელმძღვანელის დმიტრი ოლისოვის განცხადებით სექცია გააგრძელებს მუშაობას „რუსული ენის პოპულარიზაციისთვის“.

„რუსული ენის პოპულარიზაცია საზღვარგარეთ რუსეთის ჰუმანიტარული პოლიტიკის ერთ-ერთი პრიორიტეტული სფეროა. ჩვენი მთავარი ამოცანაა რუსული ენის კონკურენტუნარიანობის ხელშეწყობა, რუსული კულტურისა და მეცნიერების მიღწევებზე საყოველთაო თავისუფალი წვდომის გარანტიების შექმნა, ენის შესწავლის, რუსულ ენაზე განათლების მიღების შესაძლებლობების უზრუნველყოფა. მინდა დაგარწმუნოთ, რომ ინტერესების სექცია, მთელი მისი შემადგენლობა, გააგრძელებს მუშაობას ამ მნიშვნელოვანი მიმართულებით“, - განაცხადა ოლისოვმა ინტერესთა სექციაში გამართულ რუსული ენის დღისადმი მიძღვნილ საღამოზე.”

დიპლომატმა ასევე აღნიშნა, რომ ცნობილი ქართველი მწერლების მრავალი ნაწარმოები რუსულ ენაზეა დაწერილი, რომლებიც „არა მხოლოდ ქმნიდნენ, არამედ რუსულად აზროვნებდნენ კიდეც“, - იტყობინება რუსული სახელმწიფო საინფორმაციო სააგენტო ტასსი.

ოლისოვმა რუსულს ენას უწოდა „მეგობრობის, თანამშრომლობისა და ერთიანობის ენა, საზღვარგარეთ რუსული დიასპორის კულტურული იდენტობის შენარჩუნების საფუძველი და ერთაშორის კომუნიკაციის საშუალება“.

რუსული ენის დღე ყოველწლიურად აღინიშნება 6 ივნისს, პუშკინის დაბადების დღეს.

საქართველოში შვეიცარიის საელჩოში რუსეთის ინტერესების სექციის ხელმძღვანელად ოლისოვი მიმდინარე კვირაში დაინიშნა, მან ამ თანამდებობაზე დმიტრი ტროფიმოვი შეცვალა.

კავკასიის კვლევითი რესურსების ცენტრის (CRRC) მიერ 2024 წელს საქართველოში ჩატარებული გამოკვლევის „კავკასიის ბარომეტრის“ თანახმად, მოსახლეობაში რუსული ენის ცოდნის დონე შემდეგნაირად გადანაწილდა: 17%-ს არ აქვს საწყისი ცოდნა; 25%-ს აქვს დაწყებითი დონე; 38%-ს - საშუალო; 18%-ს - მაღალი; 2%-ს გაუჭირდა პასუხის გაცემა. გამოკითხულთა 56% რუსული ენის ცოდნას საშუალოდ ან მაღალ დონეზე აფასებს. თუმცა, შეინიშნება რუსული ენის ცოდნის დონის შემცირება წინა წლებთან შედარებით, გარდა ამისა, 2024 წელს გამოკითხულთა მხოლოდ 8%-მა მიუთითა, რომ ყოველდღიურ ცხოვრებაში გამოიყენებს რუსული ენას, როგორც მეორე ენას.