nostal.ge ახალი ამბები 
ცნობილი ბერძენი მომღერლის, 54 წლის გიორგოს მაზონაკისის მოულოდნელმა გარდაცვალებამ სამედიცინო პროცედურის ჩატარებისას საბერძნეთში დიდი გამოხმაურება გამოიწვია, რამდენიმე დღეში კი საქმე სერიოზულ სკანდალად იქცა. გამოძიებამ კერძო სამედიცინო კაბინეტში ისეთი გარემოებები გამოავლინა, რასაც ორი ექიმის დაკავება და მათ წინააღმდეგ სისხლის სამართლის საქმის აღძვრა მოჰყვა მძიმე ბრალდებით.
გიორგოს მაზონაკისი 9 სექტემბერს ათენში, კოლონაკის რაიონში მდებარე კერძო სამედიცინო დაწესებულებაში იმყოფებოდა. მას დაგეგმილი ჰქონდა პლაზმაფერეზი – სამედიცინო პროცედურა, რომლის დროსაც პაციენტის სისხლიდან პლაზმას სპეციალური აპარატით გამოყოფენ და საჭიროების შემთხვევაში სხვა ხსნარით ან დონორის პლაზმით ანაცვლებენ, ხოლო სისხლის უჯრედებს პაციენტს უბრუნებენ.
პროცედურის დაწყებამდე მომღერლის მდგომარეობა მოულოდნელად დამძიმდა და მას გული გაუჩერდა. ადგილზე გამოიძახეს სასწრაფო დახმარების სამსახური ΕΚΑΒ. რეანიმაციის მცდელობების მიუხედავად, მაზონაკისი სახელმწიფო საავადმყოფოში – „ელპისში“ გარდაიცვალა.
თავდაპირველად მთავარი კითხვა იყო: რა მოხდა კერძო სამედიცინო დაწესებულებაში და ჰქონდა თუ არა კავშირი მომხდარს დაგეგმილ პროცედურასთან? თუმცა ახლა ეს კითხვა კიდევ უფრო გართულდა.
გამოძიებას „კლინიკის“ მიმართ სერიოზული კითხვები გაუჩნდა.
საქმის გამოძიებაში მალე ჩაერთო ათენის პოლიცია, პროკურატურა და ათენის სამედიცინო ასოციაცია.
შემოწმებისას კერძო კაბინეტში პლაზმაფერეზის ორი აპარატი აღმოაჩინეს. სწორედ აქ გამოიკვეთა ერთ-ერთი ყველაზე მნიშვნელოვანი კითხვა: როგორც ათენის სამედიცინო ასოციაციის ხელმძღვანელმა გიორგოს პატულისმა განაცხადა, დაწესებულება თერაპევტის კერძო კაბინეტად იყო რეგისტრირებული, ასეთი ტიპის კაბინეტში კი პლაზმაფერეზის პროცედურის ჩატარება დაშვებული არ არის.
უფრო მეტიც, ადრე ჩატარებული შემოწმებების შესახებაც გაჩნდა კითხვები. მედიის ცნობით, 2024-2025 წლებში დაწესებულება რამდენჯერმე შემოწმდა, თუმცა პლაზმაფერეზის აპარატი მაშინ კაბინეტში არ აღმოუჩენიათ.
გამოძიებამ ასევე შეისწავლა სამედიცინო დოკუმენტები, კომპიუტერი, პაციენტების ფაილები და სხვადასხვა პრეპარატი თუ სამედიცინო საშუალება, რომლებიც კაბინეტიდან ამოიღეს ექსპერტიზისთვის.
კამერებმა გამოძიებას ახალი კითხვები გაუჩინა
საქმის ერთ-ერთ ყველაზე მნიშვნელოვან დეტალად იქცა სათვალთვალო კამერების ჩანაწერები.
თავდაპირველი ჩვენებების მიხედვით, მაზონაკისი კლინიკაში დაახლოებით 16:00 საათზე მივიდა და მალევე, ვენური კათეტერის ჩადგმის დროს, შეუძლოდ გახდა.
თუმცა კამერების ჩანაწერების შესწავლის შემდეგ სამართალდამცველებმა დაადგინეს, რომ მომღერალი დაწესებულებაში გაცილებით ადრე – დაახლოებით 13:00 საათის შემდეგ მივიდა.
ეს გარემოება განსაკუთრებით მნიშვნელოვანია, რადგან გამოძიებას ახლა რამდენიმე საათის განმავლობაში მომხდარის ზუსტი ქრონოლოგიის აღდგენა უწევს.
კიდევ ერთი საყურადღებო დეტალი: პოლიციის ინფორმაციით, როდესაც სასწრაფო დახმარების თანამშრომლები ადგილზე მივიდნენ, პლაზმაფერეზის აპარატი ჩართული და მუშაობის რეჟიმში დახვდათ. თუმცა ეს ფაქტი თავისთავად არ ამტკიცებს, რომ სწორედ პროცედურამ გამოიწვია გულის გაჩერება. საჭიროა დადგინდეს, კონკრეტულად რა ეტაპზე იყო პროცედურა, იყო თუ არა პაციენტი აპარატთან შეერთებული და რა სამედიცინო მოქმედებები ჩატარდა მანამდე.
ექიმები დააკავეს
10 სექტემბერს გამოძიება უკვე ახალ ეტაპზე გადავიდა: ორი ექიმი – იოანა გაკა და ილიას თეოდოროპულოსი დააკავეს.
ექიმების დაკავების ერთ-ერთი საფუძველი გახდა რამდენიმე მნიშვნელოვანი წინააღმდეგობა მათ ჩვენებებში – მათ შორის, მომღერლის კლინიკაში მისვლის დრო და რამდენ ხანს იმყოფებოდა იგი სამკურნალო ოთახში.
მოგვიანებით ბერძნულმა მედიამ ახალი დეტალები გამოაქვეყნა: გამოძიების ახალი მონაცემებით, პლაზმაფერეზის აპარატის პროგრამულმა ჩანაწერმა დააფიქსირა, რომ მოწყობილობა დაახლოებით 42 წუთის განმავლობაში მუშაობდა. ეს ეწინააღმდეგება ექიმების თავდაპირველ ჩვენებას, რომლის მიხედვითაც პროცედურა ჯერ დაწყებული არ იყო. სამართალდამცველებმა ექიმის ტელეფონში ასევე აღმოაჩინეს მაზონაკისის ფოტო პროცედურის დროს, რომელიც მოგვიანებით წაშლილი აღმოჩნდა. მისი აღდგენა გამოძიებას საშუალებას მისცემს დაადგინოს, ზუსტად როდის იყო ფოტო გადაღებული.
კიდევ უფრო მძიმე დეტალია ის, რომ CNN Greece-ის ცნობით, საქმის მასალებში ფიქსირდება ინფორმაცია, თითქოს მაზონაკისი დაახლოებით 1,5 საათის განმავლობაში უგონოდ იმყოფებოდა კაბინეტში, სანამ ΕΚΑΒ-ს გამოიძახებდნენ. ეს უკვე ძალიან სერიოზული საკითხია, თუმცა ფაქტი გამოძიებამ უნდა დაადასტუროს.
11 სექტემბერს ექიმები სასამართლოში გადაიყვანეს, ხოლო ათენის პროკურატურამ მათ წინააღმდეგ აღძრა სისხლის სამართლის საქმე სიკვდილის გამომწვევ საფრთხეში ჩაგდების ბრალდებით.
აუცილებლად უნდა აღინიშნოს, რომ დაკავება და ბრალის წარდგენა დანაშაულის დამტკიცებას არ ნიშნავს. ექიმების პასუხისმგებლობის საბოლოო საკითხი სასამართლომ და გამოძიების შედეგებმა უნდა დაადგინოს.
ექიმები სასამართლოს წინაშე 14 სექტემბერს წარდგებიან.
რა არის პლაზმაფერეზი
პლაზმაფერეზი სპეციალიზებული სამედიცინო მეთოდია, რომელსაც სამედიცინო პრაქტიკაში კონკრეტული დაავადებების სამკურნალოდ იყენებენ – მათ შორის, ზოგიერთი აუტოიმუნური, ნევროლოგიური და ჰემატოლოგიური მდგომარეობის დროს. ამასთან, ზოგიერთი კერძო კლინიკა მას „ანტი-ეიჯინგ“ და რეგენერაციული პროგრამების ფარგლებში, ორგანიზმის „გაახალგაზრდავების“ მიზნითაც სთავაზობს პაციენტებს. თუმცა პლაზმაფერეზი თავისთავად დადასტურებულ გაახალგაზრდავების მეთოდად არ ითვლება.
სპეციალისტებმა ბერძნულ მედიასთან განაცხადეს, რომ ამ პროცედურას შეიძლება ახლდეს არტერიული წნევის ვარდნა, სისხლის მიმოქცევის დარღვევა და სხვა სერიოზული გართულებები, რის გამოც მისი ჩატარების პირობებს განსაკუთრებული მნიშვნელობა აქვს.
ამიტომ გამოძიებისთვის მთავარი საკითხია არა მხოლოდ ის, რა პროცედურა იყო დაგეგმილი, არამედ ისიც, შეესაბამებოდა თუ არა მისი ჩატარების ადგილი და პირობები სამედიცინო მოთხოვნებს.
სიკვდილის ზუსტი მიზეზი ჯერ უცნობია
11 სექტემბერს ჩატარებულმა სასამართლო-სამედიცინო ექსპერტიზამ გიორგოს მაზონაკისის სიკვდილის ზუსტი მიზეზი ვერ დაადგინა – ჩატარებული ნეკროპსიის შემდეგ პასუხი კვლავ გაურკვეველია და ტოქსიკოლოგიური და ჰისტოლოგიური კვლევების შედეგებს ელოდებიან; მათ დასრულებას კი შესაძლოა ერთ თვეზე მეტი დასჭირდეს.
ამიტომ ამ ეტაპზე არასწორი იქნება იმის მტკიცება, რომ მომღერალი პლაზმაფერეზმა იმსხვერპლა, ან რომ მისი გარდაცვალება ექიმის კონკრეტულ შეცდომას უკავშირდება.
გამოძიებამ უნდა დაადგინოს სრული ჯაჭვი – როგორ მივიდა მაზონაკისი დაწესებულებაში, რა მდგომარეობაში იმყოფებოდა, რა პროცედურა ჩაუტარდა ან უნდა ჩატარებოდა, რა აპარატურა გამოიყენეს, როდის გახდა მისი მდგომარეობა კრიტიკული და რამდენად სწორად და დროულად იმოქმედა სამედიცინო პერსონალმა.
ვინ იყო გიორგოს მაზონაკისი
გიორგოს მაზონაკისი ბერძნული პოპისა და ლაიკოს მუსიკის ერთ-ერთი ყველაზე ცნობილი წარმომადგენელი იყო. სამ ათეულზე მეტი წლის კარიერის განმავლობაში მან არაერთი პოპულარული სიმღერა ჩაწერა და ქვეყნის უმნიშვნელოვანეს სცენებზე გამოდიოდა.
მისმა მოულოდნელმა გარდაცვალებამ 54 წლის ასაკში განსაკუთრებით დიდი გამოხმაურება გამოიწვია, თუმცა ტრაგედიას კიდევ ერთი, ბევრად უფრო მძიმე კითხვა დაემატა:
ჰქონდა თუ არა ამ სამედიცინო კაბინეტს პლაზმაფერეზის ჩატარების უფლება, აკმაყოფილებდა თუ არა საჭირო სამედიცინო სტანდარტებს და რატომ აღმოჩნდა იქ პლაზმაფერეზის აპარატურა?
სწორედ ამ კითხვაზე პასუხის გაცემას ცდილობს ახლა საბერძნეთის გამოძიება.
თუმცა სანამ ექსპერტიზის შედეგები და სასამართლოს გადაწყვეტილება იქნება, ერთი რამ ცხადია: საბერძნეთში სამედიცინო მომსახურების კონტროლისა და პაციენტის უსაფრთხოების საკითხები ისევ დღის წესრიგშია.
ნინო ბაჯელიძე
