ლავროვი ‘აგენტების კანონს’ გამოესარჩლა და დასავლეთი ქართული ღირებულებების განადგურებაში დაადანაშაულა

რუსეთის საგარეო საქმეთა მინისტრმა სერგეი ლავროვმა “ქართული ოცნების” მიერ “უცხოელი აგენტების” შესახებ კანონის მიღება დაიცვა და გაიმეორა საქართველოს ხელისუფლების ნარატივი, რომლის მიხედვითაც აშშ-ს, პოლონეთს, საფრანგეთსა და “ბევრ სხვა ქვეყანას” ბევრად უფრო მკაცრი მსგავსი კანონმდებლობა აქვთ. ლავროვმა აღნიშნული განცხადებები რუსულ მედია გამოცემასთან, RBK-სთან 6 სექტემბრის ინტერვიუში გააკეთა, სადაც მან ასევე დაადანაშაულა დასავლეთი საქართველოსთვის “ლგბტ დღის წესრიგის” თავსმოხვევაში და ოკუპირებულ აფხაზეთში მიმდინარე მოვლენებზე ისაუბრა.

“რასაც ამჟამად საქართველოს ხელისუფლება აკეთებს, არის თავიანთი ეროვნული იდენტობის გაცნობიერება და იმის გააზრება, რომ ქართველ ხალხს მართლმადიდებლობისა და ეროვნული კულტურის ღირებულებები აქვთ, რომლებიც გადაირეცხება, წაიშლება და გაითელება იმ “წესებით”, რომლებსაც დასავლეთი ყველას ახვევს თავს, უპირველეს ყოვლისა ლიბერალური დემოკრატიის ან თუნდაც დემოკრატიული ლიბერალიზმის ღირებულებების კონტექსტში”, – აღნიშნა ლავროვმა და დასძინა, რომ “ქართველები არ არიან კმაყოფილი ამით”, ასევე “ლგბტ დღის წესრიგის აღვირახსნილი თავსმოხვევით”.

გამოხატა რა ქართველებით აღფრთოვანება “სიცოცხლის მიმართ მათი სიყვარულის გამო” და აღნიშნა რა, რომ საქართველო “საბჭოთა კავშირის – ჩვენი საერთო სამშობლოს – პერიოდში ერთ-ერთი წამყვანი კულტურული ცენტრი იყო”, ლავროვმა განაცხადა, რომ ქართველები თავიანთ ისტორიას გულდასმით უფრთხილდებიან და ამის გამო დასავლეთისგან “საყვედურს იღებენ”.

• 31/08/2024 – ივანიშვილი: მართლმადიდებელი ეკლესიის როლი უნდა გაძლიერდეს

“საქართველოში დიდი კონფლიქტია პრეზიდენტთან”, – აღნიშნა ლავროვმა და ისაუბრა 2005 წელს საქართველოდან რუსეთის უკანასკნელი სამხედრო ბაზების გაყვანის მოლაპარაკებებზე, სადაც საქართველოს მხარეს სალომე ზურაბიშვილი წარმოადგენდა. რუსეთის საგარეო საქმეთა მინისტრმა “ერთიანი ნაციონალური მოძრაობა” და ყოფილი პრეზიდენტი სააკაშვილი დაადანაშაულა რუსეთის მიმართ საქართველოს ვალდებულებების შეუსრულებლობაში, რაც საქართველოში რუსეთის მონაწილეობით ანტიტერორისტული ცენტრის შექმნასაც ითვალისწინებდა. “მე ცოტა ხნის წინ ეს ამბავი გავიხსენე, როდესაც ვიღაცასთან ერთად განვიხილავდი მოლაპარაკებების სანდოობას დასავლეთთან და სხვა რეგიონების იმ მთავრობებთან, რომლებიც დასავლეთის მითითებებს ბრმად მიჰყვებიან”, – განაცხადა მან.

“ქართული ‘მაგალითი’ ძალიან მრავლისმეტყველია. უფრო და უფრო მეტი ქვეყანა იაზრებს, რომ ლიბერალური დემოკრატიის ეს ‘მორევი’, რომელშიც დასავლეთი მათ ‘ითრევს’, ეწინააღმდეგება მათ ფესვებს, მათი წინაპრების ტრადიციებს. სწორედ ეს ტრადიციებია, რომელთა ეროზიაც, განადგურებაც და თავიანთი, არატრადიციული ღირებულებებით ჩანაცვლებაც სურს დასავლეთს, იმ ღირებულებებით, რომელთა დახმარებითაც მას თავისი ჰეგემონიის შენარჩუნების იმედი აქვს”, – დასძინა ლავროვმა.

ლავროვს ასევე ჰკითხეს ცოტა ხნის წინ მოსკოვის მიერ ოკუპირებული აფხაზეთისთვის დაფინანსების შეჩერებაზე მას შემდეგ, რაც დე-ფაქტო მთავრობამ უარი თქვა საკამათო “აპარტამენტების კანონპროექტის” “მიღებაზე”. ლავროვმა უარყო, რომ კრემლსა და ოკუპირებულ რეგიონს შორის ურთიერთობები “გაუარესდა”, თუმცა ხაზი გაუსვა “პრეზიდენტების მიერ მიღწეული და სანქცირებული ყველა შეთანხმების შესრულების” მნიშვნელობას.

მან ასევე აღნიშნა, რომ “არის შეთანხმებათა პაკეტი”, რომელსაც ხელი მოეწერა მოსკოვსა და სოხუმს შორის და თითოეულ მხარეს “პარლამენტების მიერ რატიფიცირებული” ამ შეთანხმებებით აკისრია ვალდებულებები. მისი თქმით, “ეს არის ამ ვალდებულებათა ბალანსის დაცვის საკითხი. ჩვენს აფხაზ მეგობრებს ეს გადასარევად ესმით”.

ასევე წაიკითხეთ;

• 27/08/2024 – რუსეთის საგარეო დაზვერვის სამსახურის უფროსი: რუსეთს საქართველოში ფერადი რევოლუციის თავიდან არიდება სურს
• 26/08/2024 – რუსეთის საგარეო დაზვერვა აშშ-ის მიერ მხარდაჭერილ “თბილისის მაიდანს” მოელის
• 16/08/2024 – პუტინის თანაშემწე აშშ-ს 2008 წლის რუსეთ-საქართველოს ომის „ორგანიზებაში“ ადანაშაულებს

This post is also available in: English (ინგლისური) Русский (რუსული)